WAFATIN ANNABI SAW KASHI NA KARSHE (17)

YAKOKIN RIDDA/HURUUBUR RIDDATI:

Yaduwar labarin wafatin Manzo (SAW) koda wuya a cikin Jazirar larabawa, sai da yawan kabila sukayi ridda daga Musulunci suka koma kan addinansu na bautar gumaka, musamman kabilun da basu dade da shiga Musulunci ba, inda wasu kuma aka sami Annabawan karya a cikinsu, wasu ma kuma tun a karshen rayuwar Manzo (SAW) sukayi da'awar Annabta kamar Musailamatul Kazzab da Aswadul Ansiy, inda wasu kuma suka hana zakka.

Sababin riddan nan zamu iya tsaresu ga cikin da dalilai masu zuwa kamar haka:

1-      Da yawa daga kabilun larabawannan sun shiga addinin Musulunci ne a karshen rayuwar Manzo (SAW) bayan bude Makka, saboda haka akida da dabi'un Musulunci basu dasu a cikin zuciyarsu ba.

2-      Musulunci yayi musu tsarin bin gwamnati guda wanda hakan basu saba dashi ba ba sunfi sabawa da tsarin kabila – kabila.

3-      Musulunci ya wajabta musu fidda zakka wanda suke ganin hakan kamar wani haraji ne, sabida haka dajin cewa Manzo (SAW) ya koma ga Allah sai suka hana duk wani hakki na zakka da suke bayarwa zamanin Manzo (SAW), saboda haka S. Abubakar (RTA) ya shawarci Sahabbai kan me zai aikata dasu, inda suka ki ya yakesu saboda suna yin sallah da wasu abubuwan na Musulunci, shi kuma yaki inda yace, duk wanda ya raba tsakanin sallah da zakka to yayi ridda, saboda duk inda Allah (SWT) yace ku tsaida sallah zaice ku bada zakka. A karshe dai Sahabbai suka amince aka yaki irin wadanda suka hana zakka.

4-      Musulunci ya hana musu wasu abubuwa da zuciyoyinsu suka dasu akansu, kamar zina, caca, shan giya, da sauransu, saboda haka da jin labarin wafatin Manzo (SAW) suka koma kan wadancan dabi'u.

5-      Bayyanar Annabawan karya, a tsakanin kabilun larabawa ya janyo mutane suna bin Annabin karya da ya bayyana a kusa dasu daga cikin irin wadannan akwai Musailamatul Kazzab, Aswadul Ansiy, Sajah Attamimiyya, Dulaiha bin Khuwalid Al asadiy, kazalika a Yamen akwai Aihalutul Aswad.

Dukka wadannan kabilu da Annabawan karya s. Abubakar yaga bayansu inda ya tara runduna mai yawan gaske, sannan ya kasasu gida goma sha daya ya aika dasu zuwa ga masu ridda, daga cikin kwamandojin rundunonin nan akwai Khalif binil Waleed, Ikramatu bin Abi Jahl, Shurahbilu bin Hasanah, Muhajir bin Abi Umayya, Huzaifatu bin Muhsinin, Arjafatu bin Harsamata, Suwaidu bin Mikranin, Ala'u binil Hadramiy, Khalid bin Sa'eed, Amru binil As Duraifatu bin Hajizin.

Wadannan sune kwamandojin rundunonin sha daya 11 can da aka aika don yakin ahlin ridda, aka rubuta musu daftarin da zasu yi amfani dashi (wato takardar yaki) iri daya kowa ya fita izuwa inda aka umarce shi ya tafi inda kowa ya dawo cikin nasara, aka kashe Musailamatul karkashin Khalid binil Waleed, haka nan aka kashe Aswad Al Ansiy wanda aka kashe karkashin Mujahiru bin Abi Umayya, shi kuwa Dulaiha bayan da aka tarwatsa rundunarsa sai ya gudu zuwa Sham (Syria), wato daukar FARISA tare da Musulmi, amma Sajah da mutanen ta banu Tamim da aka tarwatsa su itama ta gudu inda daga baya akace ta tuba ta Musulunta.

Haka dai aka shafe kusan shekara guda ana yakin ridda, Allah (SWT) ya bawa rundunonin Musulmi nasara.

To da haka dai S. Abubakar yayi saura sake hade kan jazirar larabawa karkashin tutar La'ilaha illallahu Muhammadar Rasulullahi (SAW), bayan da ta tasamma wargatsewa sakamakon labarin wafatin Manzo (SAW) inda S. Abubakar ya nunawa duniya cewa Musulunci bai kare da wafatin Manzo (SAW), bari ma yanzu ya fara watsuwa shi yasa ana kammala yakokin ridda sai aka fada bude daulolin duniya inda S. Abubakar ya aikawa da rundunonin don isar da sakon Manzo (SAW) izuwa inda bai jeba a rayuwar Manzo (SAW) da shigar dashi dukkan sako da lunguna da nahiyoyin duniya. 

KHATIMA/CIKAWA:

Godiya ta tabbata ga Allah (SWT) da ya bani dama na rubuta wannann 'yar makala data danganci Tarihin Wafatin Manzo (SAW) da abinda ya biyo bayanta na maganar Khalifanci da kuma yakokin ridda (APOSTACY WARS), duk abin da aka gani a wannan littafi ba zancena bane ko tsarina, abubuwa ne da malamai na tarihi suka rubuta a littafansu na ciro nayi tarjamarsu zuwa hausa na kuma jerasu gwargwadon ikona, abinda nayi dai-dai daga Allah ne, kuma shi nake fatan ya sakamin, wanda nayi kuskure daga nine, saboda gajiyawa ina neman gafarar Allah, kuma ina neman a nabbahar dani.

Allah kayi salati ga Shugaban Talikai Annabi Muhammadu (SAW) da Ahlin gidansa da Sahabbansa masu yaki don dauka addininsa da sakonsa ba dare ba rana, ka kara yarda da wanda ya biyo hanyarsa na daga Auliya'u kamar Shehimmu Ahmad Tijjani Abul Abbas Ashshariful Hasniy da Khalifansa S. Ibrahim Inyas, kajikan iyayenmu da suka raine mu tun muna ciki har girmanmu kasaka musu da alheri ka taramu baki daya a gaban Annabi Muhammadu (SAW) ranar gobe kiyama. Alhamdu Lillahi Rabbil Alamina, Wassalam.

Dan uwanku:- MUHAMMAD DAHIR LAWAN MU'AZ ATTIJANEEY ZANGON BARE-BARI, KAO NO.196 08060306021. 12:27 na ranar JUMA'A 27 RAJAB, 1428 A.H. 10 AUGUST, 2007.